صباحك يا خير

يمر كف الفجر ع الضلمه
يتكسر الضل ع الحجر
أدن الادان من غير ولا كلمه
تنادى العصافير ع الشجر
فتح ياصبح
زقزق ياطير
الدنياحلوه
ومافى قبح
وأبتدينا بكفوفنا وعنينا
صباحك ياخير

فرح ميت

وسط زحمة تنهيداتي
وانهمار الدَّمع من معجم لغاتي
واعتراف حِلمي انُّه عاجز عن وصوله لأي سِكَّه لأمنياتي
وانكساري وسط عتمة دمع بايت فوق خدودي
كان صعودي ف ليل هواها
رحلة استكشاف لذاتي
كنت واهم روحي إن البعدّ بينها وبين عيوني ..
إستحاله
وانّنا على حاله واحده ...
مهما كان الكون دا كلُّه بألف حاله
بسّ رؤية قلبي ليها مين جرحها ؟؟
النّهارده  يوم فرحها
والموضَّح جوّه كارت الدعوه لبيض , إنّها اسودِّت حياتي
وسط زحمة تنهيداتي
جات رساله ..
( إفتكرني بحقّ رحلة شوق طويله عشتهالك
وافتكرني بكلّ كلمة عشق صادقه .. قلتهالك
لسّه حُبّك موج بغرَّق فيه شطوطي
فالنّهارده اكتب لموتي
والدموع دي خلّيهالي , والأماني .. خلّيهالك )
يا حبيبتي كنت واثق ..
إنّي بزرع حلم عمري ف قلب بور
وانّي مهما كتبت شعر بلون عنيكي
بردو هتخونّي البحور
والسطور السهله صعب حروفها تكمل في ابتعادك
يا حبيبتي ..
ياللي حبّك طيف مِعاند نبض إحساسي الرهيفْ
إسمحيلي انهي اللي بينّا بدون دموعْ
واقفلي باب الرجوع للحلم في عيون الأماني
واقطفي بإيدك ربيعك  من كياني
وازرعي ف قلبي الخريفْ
هَدهِدي دمع القصايد واضحكي لشِعري المُيتَّمْ
الليله دي عُرس حِلمي
جنبه مأتم رحمه ع " الحبّ العفيف "
يا حبيبتي الدنيا زيف فمتزعليش ..
أصل احتدام الحزن في جسمي النحيف
مش من فراغ
ولا اعتكاف بوم المواجع
في الضلوع اللي اتفرد منها الرصيف
خلّى الأمل ف عيوني زاغ
كلّ الحكايه انّ اتحاد اليأس والبؤس الغبي
- على دنيتي -
عملوا من النزف القديم ف القلب صرح
فمتحزنيش مِن كوني بتنفِّس وجع
والحلم تايه جوّه منّي بيتحدف
بين جزر فرح ومدّ جرح
يا حبيبتي ..البُرح زايد كلّ مادا
كاس مرار البعد عنّك " صاب " زياده
والسعاده ف قربي منّك .. كاسها ساده
فاستعيذي بحبّي منّي واصرفي شوقي بفراقك ..
وامشي فوق جمر اشتياقك واحلمي بكوابيس جديده
قلبي راضي ما دمتي قابله ..
وارتضيتي الحب يبقى بين شباك البعد صيده
فاعزريني ..
لو كدبت  وقلت مُتّي جوّه منّي
- رغم كدبي -
راح تعيش بيكي القصيده

نداء الى الشمس

كام أدان إدن وانا فى انتظارك
ياشمس ياأللى غضبان نهارك
الليل مليل من ذمان
ولما آن الأوان
أختفيتى
ياريت تدلينى على اى باب لدارك
هاجيلك....واخبط..
.وادور مع الكون فى مدارك
لجل مانصالح نهارك
ونطفى نار
شعللها ناس
مايهمهمش غير الشعلله
وانتى مكسوفه ولا مخسوفه
ولا عاشقه للغايب نهارك
بكره هيجى ومعاه شبكتك
ويخلص الدنيا من شبكتك
ونغنى معاه اغنيتك
ويدن ادان ينور نور عنيكى
ويرجع الغايب نهارك

المتاهة

بتسئل ليه عن الجدران عن الاحزان
عن الطفل والآهه ! ! !
تعالى شوف أهى الاوطان والانسان
شوارع نبضها متاهه
= = = =
عاوزنى أحكى عن روحى ؟ ؟
ما نا روحى ف كل الناس
ولوتنداس
مخلوطه مع التراب
مع الانفاس
أنا وطنى....
وحبى وقلبى والاحساس
مابين الشمس والوديان
بيجرى ف نيلك الشريان
= = = =
أعيش شرقان لمواويلك
ف ليلة برد حزنانة
تدفى القلب
وتطمن رموش العين
= = = =
يانور العين
ياضى الضى للمهجه
ياروح الروح
عايشه ف قلبى من جوه
ولو مجروح
حسير ع الجرح وآجيلك
و أنغملك مواويلك
يطيب الجرح
وأشوف الفرح
وعينى نور لقنديلك

حبك

قلبك بيدق على الصفحه
بنقط وحروف
أسهر على حبك واما أصحى
مش قادر اشوف
بتوضى بقلبك وحنانك
وبصلى وأطوف
مين انت يا اللى أيامك
خيلات وطيوف
ابيض شاهق
من كتر بياضه
بقوم شاهق
نبضه فى صدرى
مابتترجم لشيء موصوف

راحل من الضنى والشوق

أنا الاعمى....أنا المعصوب
أنا اللى كنت على امرى ببات مغصوب
مهو طبعى وأفوته لمين وانا أيوب !!!
راحل من الضنى والشوق
راحل ومش راجع
الا لما أفوق...........
واشوف الشمس تتهور
فى العلالى فوق
وقلبى سعتها يتنور
بدقة ضوء
ومش محتاج أشوف تانى
وانا شايف بوجدانى
معايا النور يكون ف الوحده خلانى

واحد مننا

كل واحد يشيل سلاحه

كل واحد يعلن كفاحه 
بس ياخساره 
لو اللى حدد مننا
قلبه وروحه
ضض روحه وضضنا
هيعلن على مين الكفاح ؟
يطلق على مين السلاح ؟
اللى جاى غير اللى راح 
وسع عقلك دى الدنيا براح
وافتكر لو همناك هتهمنا

انا واقف

طالت منى ليه الوقفه
وانا واقف
عيون بتبص لى بدهشه
وانا واقف
صوابع عنى بتشاور
وانا واقف
وفكرى وعقلى بيحاور
وانا واقف
غصت برجلى جوه الخوف
وانا واقف
وخايف ابص احسن أشوف
وانا واقف
ومستنظر
ومش عارف شكلى
ف المنظر
زهول الدنيا حوليا
شقوق الغلب ف أديا
وانا واقف
بتتأخر مواعيدى.......
وبستنظر ف يوم عيدى
تنور ظلمتى بأيدى
!!!وأايدها ازاى ..وانا واقف

قلب الميدان

اتحررنا وانتفضنا
وانحبسنا فى قلب الميدان
كل واحد فينا نبضه
واحده تعلا وواحده توطا
دقتك ياقلب ضجه
ولسه ضجه من اللى بان
--------
الجدايل والدقون
والعمايل والفنون
واللى ف المحنه يخون
واللى بيحاول يفضها
والرشوه فضه
---------
المهم القلب
اللى كان فى لحضه صدى
أنتفض وادن أدان
مع نبضنا ونبض المكان
شقشق أمان
يحييى قلب القلب
فى قلب الميدان

صورة غنوة

السلام...السلام....
مرفوع لفوق مع العلم من غير حمام
الوسام....
على كل صدر بكل شوق وسط الميدان
الكلام ...
سكت الكلام والحقيقه أترجمت وأحنا الامام
للأمام ...للأمام
أرفع كمان صوت الألم وأظهر وبان
شعب واعى وثوره غنوه
أكتب تاريخ بأحلى نغم
وعيد كمان
لسه ف أديا القلم
ولسه ف الحلق الألم
ولسه صمتى
مع الندم عاملين خصام
ترجم وغنى غنوتك
الصلح خير
غنى ياطير
وارجع ياطير الحمام

موال السنابل

وتخلع الشمس توبها
تنشره ع الغيط
يطرح سنابل دهب
ملو السطوح والبيت
الحلوه تمسك رحى
وتلملم الكتاكيت
تخبز عجينها ورايا
ونكمل الحواديت
------------
شمس النهارده
رمت توبها ف غيط معزوق
طارح عيدان شعوطت
وقلبها محروق
لا الفرخه شافت نصيبها
ولا الجعان بيدوق
خضر العيدان أختفت
واحنا خبيزنا عروق
------------
هى الحكايه قدر
ولا البحور نوه
الشمس دى شمسنا
والغيط كمان هوه
وف كل بيت صومعه
مسلوبه من جوه
عملوا السنابل جاتوه
وعيالنا تتلوى

بنت النيل

ياورده جميلة
خضارك برق
جوه الخميلة
طفل هواكى أنسرق
***
يا موضيه جوفك
بورد النيل
ومداريه خوفك
بلفة المنديل
***
حلى شعورك
ف الهوى......
دى شعره واحده
لجرح بلدك دوا

رسالة إليك

عايزة أخبى القلب جوه شريانك وأنام
وأنسى همى
ويبقى حلمى الابتسام
سامعه حبك
خطوته ماشيه بطيئة
ونظرتك
جوه أعصابى مضيئه
من دقيقة
طاش منى الصواب
ضمنى ألف ضلام
وردنى ميت ألف باب
الشوارع
أتبعترت تحت رجليا
العرايا
والقلوب أتنطورت
إلا قلبك يادفايا
مشتقالك آآآه تعالى
ضمنى
شوق عنيك جوه قلبى هذنى
ولسه عمر الحلم صاحى
يشدنى

مهما تكون

ياضمه وجامعه
ياشده ...وكسره كل سكون
انا اللى كنت بيك مفتون
وكنت ورده
عبيرها يملا فراغ الكون
مهمى تكون
مش لازم ياسيدى تخون
****
انا وانت بقينا أصحاب
انا وأنت اكيد احباب
فى عز الحب يا مجنون
زرعت الود جوه ظنون
وبندهلك ألاقى عيون
يطل الكدب جواهم
وانا واهم
ومين هتكون !!!!!!
لا أنافاهم
ولاعاوز اكون فاهم
معدش السر معاك مدفون
ومهمى تكون
لوترجع بأى كلام
اكيد هتخون

الحلم

أدايه بحلم أحس ...

بمواويل الغرام والشوق حكايه
من لوعة المشتاق لحب يكون دفايا
لابسه أحلامها الصبايا
ومن صبايا
يجرى نبع الحب ويا الشوق قنايا
أد أيه بحلم أحس.....
بنبض شوقك أدشوقى
آه...يانشوة حبنا ....
ف صدر العوازل الف نار
أخرجى من صدرهم
وولعى شوق حبيبى كلنهار
يشوفه قلبى ويلمسه...
صوت ولا همس يهمسه
أد ايه بحلم............................أحس